![Gossip Lanka](https://blogger.googleusercontent.com/img/b/R29vZ2xl/AVvXsEg02eRUfksMWUV-GnxKqzs69wfVrjvq57XWXmtUItM-9CiGBC7v8lNsizQILHlZNPO2g3Vuo7PHDVopP4nXuteLD1QquSg7JiquiZAVPpvFxjjshTVI0Jf7FzRkvbcBhNw7B5i1Y21DlhMVUWumWdURb41Z0NPJehRaheW2GSzUQLyFtIQBgWkmYDXjh5w/s1600/noha-clz.gif"")
වින්දිතයන්ගේ මුදල් වසරක් ඇතුළත ගෙවන්නැයි රුමේනියා රැකියා ජාවාරමේ නිරතවූ ‘රේන්බෝ මෑන්පවර්’ හිමිකරුට අධිකරණයෙන් නියෝගයක්!
රුමේනියාවේ රැකියා ලබාදෙන බව පවසා මහාපරිමාණ විදේශ රැකියා ජාවාරමක නිරත වූ ‘රේන්බෝ මෑන්පවර්’ විදේශ රැකියා නියෝජිත ආයතනයේ අයිතිකරුට, වින්දිතයන්ට අයත් මුදල් වසරක් ඇතුළත පියවන ලෙස ගංගොඩවිල මහේස්ත්රාත්වරයා නියෝග කර තිබේ.
ශ්රී ලංකා විදේශ සේවා නියුක්ති කාර්යාංශය සඳහන් කළේ, මෙම නඩුව ඊයේ නුගේගොඩ ප්රධාන මහේස්ත්රාත් අධිකරණය හමුවේ විභාගයට ගත් බවයි.
එහිදී පැමිණිලිකරුවන් වෙනුවෙන් අපරාධ පරීක්ෂණ දෙපාර්තමේන්තුවේ මූල්ය විමර්ශන ඒකකය සහ විදේශ සේවා නියුක්ති කාර්යාංශයේ විශේෂ විමර්ශන ඒකකය පෙනීසිටියේය.
සැකකරු 2025 ඔක්තෝබර් 31 වැනිදා සිට මාස හයකට වැඩි කාලයක් රක්ෂිත බන්ධනාගාරගත කර සිටියි.
සැකකරු සතුව රුපියල් මිලියන 100කට අධික වත්කම් ඇති බැවින්, ඔහු ඇප මත මුදා හැරීමෙන් පසු වසර දෙකක් ඇතුළත මුදල් පියවීමට අවසර දෙන ලෙස විත්ති පාර්ශවයේ නීතිඥවරු ඉල්ලා සිටියහ.
කෙසේවෙතත්, කාර්යාංශයේ නීති නිලධාරී ජනක කාරියවසම් තර්ක කළේ, වින්දිතයන් මුදල් ගෙවා දැනටමත් වසර තුනහමාරකට වැඩි කාලයක් ගතවී ඇති බැවින් ප්රමාදයකින් තොරව වන්දි ලබා දිය යුතු බවයි.
දෙපාර්ශවයේ කරුණු සලකා බැලූ මහේස්ත්රාත්වරයා, වසරක් ඇතුළත මුදල් ගෙවිය යුතු බවට ඇප කොන්දේසියක් පැනවීය.
ඊට අමතරව රුපියල් මිලියන 5 බැගින් වූ පුද්ගල ඇපකරුවන් සිව්දෙනකු සහ රුපියල් 500,000ක මුදල් ඇපයක් ද නියම කෙරිණි.
සැකකරු අධිකරණයට ඉදිරිපත් කිරීමට අපොහොසත් වුවහොත් රුපියල් මිලියන 50ක ඇප බැඳුම්කරය රාජසන්තක වන බවට ද නියෝග කෙරිණි.
සැකකරුට සහ ඇපකරුවන්ට විදේශ ගමන් තහනම් කර ඇති අතර, නියමිත පරිදි මුදල් නොගෙවුවහොත් ඇප අවලංගු කර සැකකරු නැවත රක්ෂිත බන්ධනාගාරගත කරන බවට අධිකරණය අනතුරු ඇඟවීය.
මේ පුවත තව අයට බලන්න
