උගන්ඩා ඩොලර් බිලියන 18ට පසු දැවැන්තම හොරකම අධිකරණ ඇමති හෙලි කරයි.. ඩොලර් බිලියන 10.6ක්.. එය ලංකාවේ ණයවලින් 25%ක්... IMF ණය මෙන් තුන් ගුණයක්!

2016-2017 කාලසීමාවේදී හිටපු අමාත්‍ය පී. හැරිසන් සහ හිටපු ජනාධිපති බිරිඳකගේ මැදිහත්වීමෙන් සිදුකළ කිරි හරක් ආනයනය කිරීමේ ව්‍යාපෘතියක් හේතුවෙන් රජයට ඇමරිකානු ඩොලර් බිලියන 10.6ක දැවැන්ත පාඩුවක් සිදුව ඇති බව අධිකරණ අමාත්‍ය හර්ෂණ නානායක්කාර මහතා අනාවරණය කරයි.

විපක්ෂයේ මන්ත්‍රීවරුන් වත්මන් රජය යටතේ සිදුවූ බව කියන ඩොලර් මිලියන 2.5ක පාඩුවක් ගැන කෙකර ගාමින් සිටියද, ඔවුන් බලයේ සිටි සමයේ සිදු වූ මෙවැනි මහා පරිමාණ දූෂණ හමුවේ නිහඬව සිටි බව අමාත්‍යවරයා පෙන්වා දෙයි.

වත්මන් රජය කිසිදු වංචාවක් වසන් කිරීමට උත්සාහ නොකරන බවත්, මිලියන 2.5ක පාඩුව සම්බන්ධයෙන් දැනටමත් ජාත්‍යන්තර සහාය ඇතිව විධිමත් විමර්ශන ආරම්භ කර ඇති බවත් ඔහු අවධාරණය කළේය.

මීට අමතරව ග්‍රීක බැඳුම්කර ගනුදෙනුවෙන් සිදුවූ ඩොලර් මිලියන 12.6ක පාඩුව, මහ බැංකුව හරහා සිදුවූ ඩොලර් බිලියන 6ක ගනුදෙනුව, හම්බන්තොට රෝහලට භාණ්ඩ ගෙන්වීමේදී සිදුවූ ඩොලර් මිලියන 1.4ක වංචාව සහ රුපියල් මිලියන 4000ක පාඩුවක් කළ ගිං-නිල්වලා ව්‍යාපෘතිය වැනි පැරණි දූෂණ වංචා පිළිබඳවද වත්මන් රජය යටතේ නැවත විමර්ශන ආරම්භ කර ඇති බව අමාත්‍යවරයා වැඩිදුරටත් සඳහන් කළේය.

"අපි ආවේ හොරු අල්ලන්නයි, හොරුන්ට දඬුවම් දෙන්නයි. ඒක අපි කරනවා," යැයි පවසමින් අමාත්‍යවරයා කියා සිටියේ මෙම වසර අවසානය වන විට බොහෝ දූෂණ නඩු අධිකරණය හමුවේ ගොනු කරන බවයි.

අමාත්‍යවරයා සඳහන් කළ ඩොලර් බිලියන 10.6ක මුදල නිවැරදි නම්, එය ශ්‍රී ලංකාවේ සමස්ත විදේශ ණය බර හා සසඳන විට ඉතා විශාල ප්‍රමාණයකි.

ශ්‍රී ලංකා මහ බැංකුවේ නවතම දත්ත වාර්තා අනුව, ශ්‍රී ලංකාවේ සමස්ත විදේශීය ණය ප්‍රමාණය ඇමරිකානු ඩොලර් බිලියන 37ක් පමණ වේ (මධ්‍යම රජයේ විදේශ ණය).

ඒ අනුව, අමාත්‍යවරයා පවසන ඩොලර් බිලියන 10.6ක පාඩුව යනු ශ්‍රී ලංකාවේ මුළු විදේශ ණය ප්‍රමාණයෙන් 28.6%ක් (එනම් හතරෙන් පංගුවකට වඩා වැඩි) ප්‍රමාණයකි.

මෙම මුදල කොතරම් විශාලද යත්, එය ශ්‍රී ලංකාවට මේ වන විට ජාත්‍යන්තර මූල්‍ය අරමුදලෙන් (IMF) ලැබීමට නියමිත සම්පූර්ණ ණය මුදල මෙන් (ඩොලර් බිලියන 2.9) තෙගුණයකටත් වඩා වැඩි අතිවිශාල ධනස්කන්ධයකි.