ඉරාන යුද්දයට නාවැයි ට‍්‍රම්ප් නේටෝ ලොක්කන්ට බැණවදී... කුණුහරුප ඔන්න මෙන්න

ඉරානයට එරෙහිව ඇමරිකා එක්සත් ජනපදය හා ඊශ්‍රායලය දියත් කර ඇති යුද මෙහෙයුම් සඳහා සහය නොදැක්වීම සම්බන්ධයෙන් නේටෝ (NATO) සංවිධානයේ සාමාජික රටවල් දැඩි ලෙස විවේචනය කිරීමට ඇමරිකානු ජනාධිපති ඩොනල්ඩ් ට්‍රම්ප් පියවර ගෙන තිබේ.

සිය දිගුකාලීන මිත්‍ර රටවල් මෙලෙස සහය දැක්වීමෙන් වැළකී සිටීම "බියගුලු ක්‍රියාවක්" බව ජනාධිපතිවරයා අවධාරණය කරයි.

සමාජ මාධ්‍ය ඔස්සේ විශේෂ ප්‍රකාශයක් කරමින් ජනාධිපති ට්‍රම්ප් සඳහන් කළේ, ඇමරිකා එක්සත් ජනපදයේ දායකත්වයෙන් තොරව නේටෝ සංවිධානය යනු හුදෙක් "කඩදාසි කොටියෙකු" පමණක් වන බවයි.

පසුගිය පෙබරවාරි 28 වනදා ඇමරිකා-ඊශ්‍රායල ඒකාබද්ධ ප්‍රහාර ආරම්භ වීමත් සමඟ මැදපෙරදිග කලාපය දැඩි අර්බුදයකට ලක් විය. මෙම ගැටුම් හේතුවෙන් මේ වන විට දහස් ගණනක් මියගොස් මිලියන සංඛ්‍යාත පිරිසක් අවතැන්ව ඇති අතර, ලෝක වෙළඳපොළ ද දැඩි කැළඹීමකට ලක්ව ඇත.

ඉරානය පාලනය කරන හෝමූස් සමුද්‍ර සන්ධිය හරහා නෞකා ගමනාගමනය සුරක්ෂිත කිරීම සඳහා සහය වන ලෙස ට්‍රම්ප් පරිපාලනය මිත්‍ර රටවලින් ඉල්ලා සිටියද, එම රටවල් යුද්ධය සම්බන්ධයෙන් පූර්ව උපදෙස් ලබා නොදුන් බවට පවසමින් සහය දීමෙaන් වැළකී සිටී.

යුද මෙහෙයුම්වලට එක් නොවී, ඉන්ධන මිල ඉහළ යාම පිළිබඳව පමණක් මැසිවිලි නැගීම සම්බන්ධයෙන් ජනාධිපතිවරයා එහිදී සිය අප්‍රසාදය පළ කළේය.

"දැන් යුද්ධය යුදමය වශයෙන් ජයග්‍රහණය කර තිබෙනවා. ඔවුන්ට ඇති අවදානම ඉතා අඩුයි. එසේ තිබියදීත් ඉහළ ඉන්ධන මිල ගැන ඔවුන් මැසිවිලි නගනවා. නමුත් ඉන්ධන මිල ඉහළ යාමට ප්‍රධාන හේතුව වූ හෝමූස් සමුද්‍ර සන්ධිය විවෘත කිරීමට ඔවුන් උදව් කරන්නේ නැහැ. මෙය ඉතා සරල හා අවදානම අඩු මිලිටරි මෙහෙයුමක්. ඔවුන් බියගුල්ලන්, අපට මෙය අමතක වන්නේ නැහැ," යැයි ට්‍රම්ප් වැඩිදුරටත් සඳහන් කළේය.

කෙසේ වෙතත්, ජර්මනිය, බ්‍රිතාන්‍යය, ප්‍රංශය, ඉතාලිය, ජපානය සහ කැනඩාව ඇතුළු රටවල් ඒකාබද්ධ නිවේදනයක් නිකුත් කරමින් පවසා ඇත්තේ සමුද්‍ර සන්ධියේ ආරක්ෂාව තහවුරු කිරීමට "සුදුසු උත්සාහයන්" සඳහා සහය වන බවයි. නමුත් ජර්මානු චාන්සලර් ෆ්‍රෙඩ්රික් මර්ස් අවධාරණය කළේ එවැනි සහයෝගයක් ලබා දිය හැක්කේ සටන් විරාමයකින් පසුව පමණක් බවයි.

බ්‍රසල්ස් නුවර පැවැති යුරෝපා සංගම් සමුළුවෙන් අනතුරුව අදහස් දැක්වූ ප්‍රංශ ජනාධිපති එමානුවෙල් මැක්‍රෝන් සඳහන් කළේ, ජාත්‍යන්තර නීතිය ආරක්ෂා කිරීම සහ ගැටුම් සමනය කිරීම තම අරමුණ බවයි. මෙම යුද්ධයට මැදිහත් වීමට කිසිදු පාර්ශ්වයක කැමැත්තක් නොමැති බව ද ඔහු වැඩිදුරටත් පැවසීය.