කදුකරයට මහ වැහි.. වහා ඉවත් වන්නැයි ප‍්‍රදේශ රැසකට දැනුම් දේ..

ගතවූ පැය 24 තුළ වර්ෂාපතනය මිලිමීටර් 150 ඉක්මවා යාම හේතුවෙන් දිස්ත්‍රික්ක කිහිපයක ප්‍රාදේශීය ලේකම් කොට්ඨාශ සඳහා වහාම ක්‍රියාත්මක වන පරිදි 'මට්ටම 3' (Level 3) රතු නිවේදන නිකුත් කිරීමට ජාතික ගොඩනැගිලි පර්යේෂණ සංවිධානය (NBRO) පියවර ගෙන ඇත.

පවතින අධික වර්ෂා සහිත කාලගුණ තත්ත්වය හේතුවෙන් නායයෑම්, බෑවුම් කඩා වැටීම්, ගල් පෙරළීම් සහ පොළොව ගිලා බැසීමේ දැඩි අවදානමක් පවතින බැවින් අදාළ ප්‍රදේශවල ජනතාව වහාම ආරක්ෂිත ස්ථාන කරා ඉවත් විය යුතු බව එම සංවිධානය අවධාරණය කරයි.

රතු නිවේදන (Level 3 - Red) නිකුත් කර ඇති ප්‍රදේශ:

පහත දැක්වෙන දිස්ත්‍රික්ක සහ ප්‍රාදේශීය ලේකම් කොට්ඨාශ සඳහා මෙම ඉවත් වීමේ නිවේදන නිකුත් කර ඇත:

මහනුවර දිස්ත්‍රික්කය: යටිනුවර, දොළුව, උඩුදුම්බර සහ ගඟ ඉහළ කෝරළේ.

කෑගල්ල දිස්ත්‍රික්කය: යටියන්තොට, කෑගල්ල, දෙහිඕවිට, අරණායක සහ මාවනැල්ල.

මාතලේ දිස්ත්‍රික්කය: රත්තොට සහ උකුවෙල.

රත්නපුර දිස්ත්‍රික්කය: රත්නපුර ප්‍රාදේශීය ලේකම් කොට්ඨාශය.

මහජනතාව සැලකිලිමත් විය යුතු කරුණු:

නායයෑමකට පෙර දැකිය හැකි පූර්ව ලක්ෂණ පිළිබඳව දැඩි අවධානයෙන් පසුවන ලෙස ජනතාවගෙන් ඉල්ලා සිටිනු ලැබේ. විශේෂයෙන්ම:

පොළොවේ ඇතිවන ඉරි තැලීම් සහ ගැඹුරු පැළුම්.

ගස්, විදුලි කණු හෝ වැටවල් ක්‍රමයෙන් ඇලවී යාම.

ගොඩනැගිලි බිත්ති සහ ගෙබිම මත ඇතිවන පිපුරුම්.

එක්වරම නව උල්පත් ඇතිවීම හෝ පැවති ජල උල්පත් බොර වීම.

මෙම ලක්ෂණ දක්නට ලැබෙන්නේ නම් වහාම එම ප්‍රදේශවලින් ඉවත් විය යුතු අතර, ජාතික ගොඩනැගිලි පර්යේෂණ සංවිධානය සහ ආපදා කළමනාකරණ මධ්‍යස්ථානය ලබාදෙන ඉදිරි උපදෙස් පිළිපදින ලෙස ද දැනුම් දෙනු ලැබේ. මෙම අනතුරු ඇඟවීම 2026 පෙබරවාරි 22 රාත්‍රී 8:30 දක්වා බලපැවැත්වේ