පාස්කු විමර්ශන නොමග යවපු සාරාගේ තුන්වැනි DNA පරීක්ෂණය ගැන CIDයේ අවධානය

පාස්කු ඉරිදා ප්‍රහාරයන්ට සම්බන්ධ සයින්දමරුදු හි ආරක්ෂිත නිවසක සිදු වූ මරාගෙන මැරෙන බෝම්බ ප්‍රහාරයකින් මියගිය අය අතර සාරා ජැස්මින් ද සිටින බවට සඳහන් තුන්වැනි DNA වාර්තාව අපරාධ විමර්ශනය නොමඟ යැවීමේ අරමුණින් නිකුත්කර තිබේද යන්න පිළිබඳ අපරාධ පරීක්ෂණ දෙපාර්තමේන්තුව අවධානය යොමු කර තිබේ.

සයින්දමරුදු පිපිරීමෙන් මියගිය අයගෙන් සොයා ගන්නා ලද ශරීර කොටස් පිළිබඳ මීට පෙර DNA පරීක්ෂණ දෙකක් තීරණාත්මක ප්‍රතිඵල ලබාදීමට අපොහොසත් වූ අතර, වසර තුනකට පසුව සිදුකරන ලද තුන්වැනි පරීක්ෂණයෙන් වෙනස් ප්‍රතිඵලයක් ලැබී තිබීම නිසා මෙම අවධානය යොමුවිය.

පාස්කු ඉරිදා ත්‍රස්ත ප්‍රහාර පිළිබඳ පරීක්ෂණ සඳහා අවශ්‍ය වූ සාරා ජැස්මින්, පොලිසිය විසින් නිකුත් කරන ලද නිල් නිවේදනයකට යටත්ව සිට තිබිණි.

සයින්දමරුදු ආරක්ෂිත නිවසේ පිපිරීම සිදු වූයේ 2019 අප්‍රේල් 26 වැනිදා පාස්කු ඉරිදා ප්‍රහාරයෙන් දින පහකට පසුවය.

පුලස්තිනී මහේන්ද්‍රන් ලෙසද හැඳින්වෙන සාරා ජැස්මින් එම ස්ථානයේ සිටි බවත් ඇය පාස්කු ඉරිදා කටුවපිටිය පල්ලියට පහරදුන් මරාගෙන මැරෙන බෝම්බකරුගේ බිරිඳ බවත් විශ්වාස කරන බැවින් මෙම සිද්ධිය විමර්ශකයන්ට විශේෂ වැදගත්කමක් ලබා දුන්නේය.

පිපිරුම් ස්ථානයෙන් ගොඩගත් ශරීර කොටස් සම්බන්ධයෙන් සිදුකරන ලද මූලික DNA පරීක්ෂණවලදී අවස්ථා දෙකකදීම, සාරා ජැස්මින්ගේ දේහය ඒ අතර ඇති බව තහවුරු කිරීමට අසමත් විය.

එහි ප්‍රතිඵලයක් ලෙස, පාස්කු ප්‍රහාරයෙන් වසර තුනකට පසු, 2022 අප්‍රේල් 27 වැනිදා තුන්වැනි DNA පරීක්ෂණයක් සිදු කරන ලදී.

මේ සඳහා, අම්පාර පොදු සුසාන භූමියේ වළලනු ලැබූ ශරීර කොටස් ගොඩගෙන නැවත පරීක්ෂා කරන ලදී.

මෙම තුන්වැනි පරීක්ෂණයෙන් පසුව, පිපිරුම් ස්ථානයෙන් සොයා ගන්නා ලද අස්ථි කොටස්වලින් ලබාගත් DNA සාම්පල සාරා ජැස්මින්ගේ මවගෙන් ලබාගත් DNA සමඟ ගැළපෙන බවත් එමඟින් ජීව විද්‍යාත්මක මව් – දරු සම්බන්ධතාවක් පෙන්වන බවත් පවසමින් පොලිසිය නිවේදනයක් නිකුත් කළේය.

කෙසේවෙතත්, 2020 ජූලි 21වැනිදා පාස්කු ඉරිදා ප්‍රහාර පිළිබඳ ජනාධිපති විමර්ශන කොමිසම ඉදිරියේ සාක්ෂි දෙමින්, ජ්‍යෙෂ්ඨ පොලිස් අධිකාරී සමන් විජේසේකර ප්‍රකාශකර තිබුණේ සාරා ජැස්මින් සයින්දමරුදු පිපිරීමෙන් මිය ගිය බව තහවුරු කර නොමැති බවයි.

පිපිරීමට ටික කලකට පෙර ඇය නිවසේ සිටි බව තහවුරු වී තිබුණද, පිපිරීමෙන් පසු සොයාගත් සිරුරුවලින් ලබාගත් DNA සාම්පල කිසිවක් ඇගේ මවගේ DNA සමඟ නොගැළපෙන බව ඔහු සඳහන් කළේය.

ජනවාරි 7 වැනිදා පාර්ලිමේන්තුවේදී මෙම කාරණය නැවත මතු කරන ලද අතර, මහජන ආරක්ෂක අමාත්‍ය ආනන්ද විජේපාල ප්‍රකාශ කළේ පරීක්ෂණවලින් සාරා ජැස්මින් මියගොස් නොමැති බවට යෝජනා කරන ඇතැම් තොරතුරු අනාවරණ වී ඇති බවයි.

අවශ්‍ය නම්, ඇය සොයා ගෙන ඉදිරිපත් කිරීම සඳහා වරෙන්තුවක් ලබාගැනීමට අනාගතයේදී පියවර ගන්නා බව ඔහු වැඩිදුරටත් පැවසීය.

විමර්ශනය ගැඹුරු හා සංකීර්ණ එකක් බවත්, ඇතැම් කරුණු පාර්ලිමේන්තුවේදී හෙළිකළහොත් පරීක්ෂණවලට බාධා ඇති විය හැකි බැවින් එසේ නොකරන බවත් අමාත්‍යවරයා සඳහන් කළේය.

“පාස්කු ඉරිදා ප්‍රහාර පිළිබඳ විමර්ශන අඛණ්ඩව සිදුවෙමින් පවතිනවා. මෙම පරීක්ෂණ හරහා සාරා ජැස්මින් මියගොස් නොතිබිය හැකි බවට ඇතැම් තොරතුරු දැන් මතුවී තිබෙනවා. සාරා ජැස්මින් ඉන්දියාවේ සිටින බවට තහවුරු කරන වාර්තා නැහැ. කෙසේවෙතත්, පරීක්ෂණ සිදුවෙමින් පවතිනවා. පාස්කු ප්‍රහාරයට පෙර ලබා ගත හැකි වූ තොරතුරු මත පදනම්ව, නීතිමය පියවර දැනටමත් ගෙන තිබෙනවා. ඊට අමතරව, පාස්කු ප්‍රහාරයන්ට සම්බන්ධ පුළුල් කුමන්ත්‍රණයක් ක්‍රියාත්මක වී ඇත්ද තීරණය කිරීම සඳහා නව රජය යටතේ පරීක්ෂණ සිදු කෙරෙමින් පවතිනවා. මෙය ගැඹුරු පරීක්ෂණයක්. සමහර කරුණු අනාවරණය වුවහොත් විමර්ශනයට බාධාවක් විය හැකියි, ඒවා පාර්ලිමේන්තුවේදී හෙළි කිරීමට මම අදහස් කරන්නේ නැහැ. අවශ්‍ය නම්, වරෙන්තුවක් ලබා ගැනීමට අනාගතයේදී පියවර ගනීවි.” යනුවෙන් පාර්ලිමේන්තුව අමතමින් අමාත්‍යවරයා පැවසීය.

මේ පුවත තව අයට බලන්න