සමලංගික සබදතා වරදක් කලේ සුද්දො.. අපේ එහෙම තිබුන්නෑ.. LGBTQ පිරිස් එක්ක මං කතා කළා.. කැබිනට් එක තීන්දුවක් ගනී..

දණ්ඩ නීති සංග්‍රහයේ 365 සහ 365A වගන්ති සංශෝධනය කිරීමේ ප්‍රතිපත්තිය රජය සතු වුවත්, ඒ සඳහා නිශ්චිත කාල රාමුවක් තවමත් සකස් කර නොමැති බව අධිකරණ ඇමති හර්ෂණ නානායක්කාර මහතා පසුගියදා දෙරණ රූපවාහිනියේ පැවති වැඩසටහනකදී අදහස් දක්වමින් කියා සිටියේය.

පනත ගෙන ඒමේ කාලය තීරණය කරනු ලබන්නේ කැබිනට් මණ්ඩලය විසින් බවද ඒ මහතා අවධාරණය කළේය.

ජාතික ජන බලවේගයේ ප්‍රතිපත්ති ප්‍රකාශනයේ 63 වැනි පිටුවේ පැහැදිලිව සඳහන් කර ඇත්තේ දණ්ඩ නීති සංග්‍රහයේ 365 සහ 365A වගන්ති සංශෝධනය කරන බවයි.

මෙම වගන්ති හරහා සමලංගික සම්බන්ධතා නීතිය හමුවේ අපරාධමය වරදක් වී ඇති බවත්, මෙම නීති බ්‍රිතාන්‍ය වික්ටෝරියානු යුගයෙන් මෙරටට ආ නීතියක් මිස අපේ රටෙන් ආ නීතියක් නොවන බවත් ඇමතිවරයා පෙන්වා දුන්නේය.

අමාත්‍යවරයාට අනුව, රජයේ ප්‍රතිපත්තිය වන්නේ ස්ත්‍රී පුරුෂභාවය මත කිසිදු කෙනෙකු ආන්තිකකරණයකට ලක් නොවිය යුතු බවයි. මෙම ප්‍රතිපත්තිය මුල සිටම පවතින අතර, සමරිසි සහ වෙනත් අනන්‍යතාවයන් සහිත ප්‍රජාවන්ද සමාජයේ කොටසක් ලෙස සලකන බව ඔහු පැවසීය.

දැනට බලයට පැමිණ මාස 12කට ආසන්න කාලයක් ගත වී ඇතත්, මෙම නීති සංශෝධනය කිරීම සඳහා කෙටුම්පතක් හෝ පියවරක් ගෙන නොමැති බව ඇමතිවරයා පිළිගත්තේය.

මෙම ප්‍රමාදයට හේතු දක්වමින් ඇමති නානායක්කාර මහතා පැවසුවේ, පනත ගෙන ඒමට පෙර මීට වඩා හොඳ සාධනීය සමාජ කතිකාවතක් නිර්මාණය විය යුතු බවයි. නීති ගෙන ආ යුත්තේ අඩුම ප්‍රතිරෝධයක් සහිතව ක්‍රියාත්මක වන පරිදි බවද ඔහු අවධාරණය කළේය.

තවද, ඔහු සඳහන් කළේ LGBTQ කණ්ඩායම් මෙන්ම ශ්‍රී ලංකා මානව හිමිකම් කොමිෂන් සභාවේ (රයිට්ස් කමිෂන්) නියෝජිතයන්ද මේ පිළිබඳව තමා සමඟ සාකච්ඡා කර ඇති බවයි.

පනත ගෙන එන දිනය පිළිබඳව නිශ්චිත පිළිතුරක් දීම අධිකරණ ඇමතිවරයා ප්‍රතික්ෂේප කළේය.

“පනත ගේන වෙලාව හෝ දවස මට කියන්න බැහැ,” යනුවෙන් ප්‍රකාශ කළ ඒ මහතා, එය කැබිනට් මණ්ඩලය සාමූහිකව තීරණය කළ යුතු කරුණක් බව පැවසීය.

කෙසේ වෙතත්, ප්‍රතිපත්ති ප්‍රකාශනයේ ඇති දේවල් ඉදිරි වසර හතර ඇතුළත සිදුකරන බවට රජය අපේක්ෂා කරන බවත්, ඒ සඳහා ඉදිරියේදී කැබිනට් මණ්ඩලය සමඟ සාකච්ඡා කර කාල සටහනක් සකස් කළ හැකි බවත් ඇමති නානායක්කාර මහතා වැඩිදුරටත් පැවසීය