තඹුත්තේගම හිටපු හමුදා නිලධාරියෙක් සුරාබදු කොමසාරිස් ධුරයට… සුරාබදු සංගම්වල විරෝධය….!

සුදුසුකම් සහිත නිලධාරීන් සුරාබදු දෙපාර්තමේන්තුවේ සහ රාජ්‍ය පරිපාලන සේවයේ සිටිය දී ශ්‍රී ලංකා නාවික හමුදාවේ විශ්‍රාමික නිලධාරියකු වන එම්.බී.එන්.ඒ. ප්‍රේමරත්න සුරාබදු කොමසාරිස් ජනරාල් තනතුරට පත් කිරීම පිළිබඳව සුරාබදු වෘත්තිය සමිති එකමුතුව සිය විරෝධය පළ කර තිබේ.

මෙම තනතුර සඳහා සුරාබදු දෙපාර්තමේන්තුවේ සුදුසුකම් සහිත ජ්‍යෙෂ්ඨ නිලධාරීන් තිදෙනකු සිටියදී පරිබාහිර නිලධාරියකු පත් කළ සුරාබදු දෙපාර්තමේන්තු ඉතිහාසයේ ප්‍රථම අවස්ථාව මෙය බවට ඔවුහු චෝදනා කරති.

මෙම තනතුරට මීට පෙර පත්කර ඇත්තේ සුරා බදු දෙපාර්තමේන්තුවේ ජ්‍යෙෂ්ඨ නිලධාරියකු හෝ රාජ්‍ය පරිපාලන සේවයේ ජ්‍යෙෂ්ඨ නිලධාරියකු බව වෘත්තිය සමිතිය එකමුතුව පෙන්වා දෙයි.

තවද රාජ්‍ය පරිපාලන සේවයේ නිලධාරියකු ප්‍රධාන තනතුරට පත් කිරීම සඳහා මීට පෙර ඇති කරගත් එකඟතාද කඩ කරමින් මෙම තනතුරට විශ්‍රාමික නාවික හමුදා නිලධාරියකු පත්කිරීම ගැටලුවක් බවද වාර්තා වෙයි.

නව සුරා බදු කොමසාරිස් ජෙනරාල් තනතුර සඳහා දෙපාර්තමේන්තු නිලධාරියකු පත්කරන ලෙස ඉල්ලා සුරාබදු වෘත්තීය සමිති එකමුතුව ජනාධිපති අනුර කුමාර දිසානායක මහතා වෙත ජුලි මස 6 වන දින ලිපියක් මගින්ද දැනුම් දී තිබේ.

දිගු කලක් තිස්සේ ක්ෂේත්‍රයේ අත්දැකීම් හා පලපුරුද්ද ඇති නිලධාරියකු පත් කිරීම තුළින් සුරාබදු ආදායම් ඉහළ නංවා ගතහැකි බවයි ඔවුන් එම ලිපියෙන් දැනුම් දී ඇත්තේ.

සුරා බදු කොමසාරිස් ජනරාල් තනතුර සඳහා රාජ්‍ය පරිපාලන සේවයෙන් නිලධාරියකු පත් නොකිරීම සම්බන්ධයෙන් ශ්‍රී ලංකා පරිපාලන සේවා සංගමයෙන් කළ විමසීමකදී ඔවුන් කියා සිටියේ ඉදිරි දින කිහිපය තුළදී මෙහි පවතින අසාර්ථකත්වය පිළිබඳව ජනාධිපතිවරයාට ලිඛිතව දැනුම් දෙන බවය. මේ ආකාරයෙන් සුදුසුකම් නොමැති පුද්ගලයින් ආයතන සඳහා පත්කිරීම හරහා රාජ්‍ය සේවයේ ව්‍යුහය බිඳ වැටෙන බවද ඔවුහු පෙන්වා දෙති.

නව සුරාබදු කොමසාරිස් ජෙනරාල් එම්.බී.එන්.ඒ. ප්‍රේමරත්න ශ්‍රී ලංකා නාවික හමුදාවේ විශ්‍රාමික නිලධාරියකු වන අතර ඔහු තඹුත්තේගම ප්‍රදේශයේ උපත ලැබුවෙකි. ඔහු ගම්පහ වික්‍රමාරච්චි දේශීය වෛද්‍ය විශ්වවිද්‍යාලයේ උප කුලපතිනි ආචාර්ය වසන්තා සුබසිංහගේ සැමියා වන අතර ඇය ද ජනාධිපතිවරයා විසින් එම තනතුරට පත් කළේ මීට දෙසතියකට පෙර ය. ආචාර්ය වසන්ත සුබසිංහ 2024 මහා මැතිවරණයේ දී ජාතික ජන බලවේග ජාතික ලැයිස්තුවද නියෝජනය කළාය.

-emanisa