එහි දී අදාළ නීතිඥවරුන් අධිකරණයට දන්වා තිබුණේ, මෙම සිද්ධිය සම්බන්ධයෙන් සොයා බැලීමට පත් කළ කමිටු දෙක විසින් ම ඔවුන්ගේ පරීක්ෂණ වාර්තා මෙතෙක් අධිකරණයට ඉදිරිපත් කොට නොමැත්තේ සිද්ධියට සම්බන්ධ සෞඛ්‍ය නිලධාරීන් ආරක්ෂා කර ගැනීමට බවට විශාල සැකයක් පවතින නිසා බවයි.
එහෙයින් ඔවුන් ව පොලීස් අත්අඩංගුවට ගෙන ප්‍රශ්න කිරීමෙන් වැදගත් තොරතුරු රැසක් හෙළි කර ගැනීමට හැකි වනු ඇතැයි පවසන නීතිඥවරුන් අධිකරණය හමුවේ කියා සිටියේ ඒ සඳහා නියෝගයක් නිකුත් කරන ලෙසයි.
යාපනය රෝහලේ පාලන අධිකාරිය මෙන් ම උතුරු පළාත් සෞඛ්‍ය සේවා අධ්‍යක්ෂ කාර්යාලයේ නිලධාරීන් මෙම සිද්ධිය යටපත් කොට සිද්ධියට සම්බන්ධ පිරිස බේරා ගැනීමට කටයුතු කරගෙන යන බවට සාක්කි විශාල ප්‍රමාණයක් ඇති බවද නීතිඥවරු අධිකරණය හමුවේ වැඩිදුරටත් දන්වා තිබෙනවා.
සිද්ධියට මුහුණ දුන් දැරිය වාට්ටුවට ඇතුළත් කළ අවස්ථාවේ දී ප්‍රධාන හෙදිය ජංගම දුරකතනයෙන් වීඩියෝ ඇමතුමක් ලබා ගෙන ඊට පිළිතුරු ලබා දෙමින් සිටි බවට, ඇසින් දුටු සාක්කි කමිටුව වෙත ලැබී ඇති නිසා යාපනය ශීක්ෂණ රෝහලේ හෙදියන් ඇතුළු පිරිසට ජංගම දුරකතන භාවිත කිරීම තහනම් කලත් දැරියට වූ අසාධාරණය සම්බන්ධයෙන් මෙතෙක් පියවර ගෙන නොමැති බවයි නීතිඥයන් අධිකරණය හමුවේ ප්‍රකාශ කර තිබුණේ.
මේ නිසා එම වාට්ටුව බාරව සිටි වෛද්‍යවරිය හෙදිය හා පිරිමි හෙද නිලධාරියා වහාම අත් අඩංගුවට ගත යුතු බවද නීතිඥවරු අධිකරණයට දන්වා සිටියා.
