හිටපු යාළුවො ආයෙත් එක වේදිකාවකට - අද පොහොට්ටුවේ රැළියට විමල්ගේ පංචායුදෙත් යනවලු!
ශ්රී ලංකා පොදුජන පෙරමුණ විසින් සැප්තැම්බර් 12 වනදා (අද) සංවිධාන කරනු ලබන විශේෂ ජන රැළියට සහභාගී වීමට විමල් වීරවංශගේ නායකත්වයෙන් යුත් ජාතික නිදහස් පෙරමුණ තීරණය කර ඇත. ශ්රී ලංකා පොදුජන පෙරමුණ විසින් කරන ලද ආරාධනාව පිළිගෙන එම මහා රැළියට සහය පළ කිරීමට පක්ෂයේ දේශපාලන මණ්ඩලය තීරණය කළ බව ජාතික නිදහස් පෙරමුණේ නායක විමල් වීරවංශ පවසයි.
ජාතික වශයෙන් වැදගත් වන කරුණු මුල් කරගනිමින් විපක්ෂයේ දේශපාලන කණ්ඩායම් අතර එකමුතුකම සහ සහයෝගීතාවය ගොඩනැගීම මෙම තීරණයේ ප්රධාන අරමුණ බව වීරවංශ සඳහන් කළේය.
ආර්ථික අර්බුදයෙන් පසුව සහ දූෂණයට එරෙහිව පියවර ගනු ඇතැයි යන දැවැන්ත බලාපොරොත්තු සහිතව ජනතාව වත්මන් ආණ්ඩුව බලයට පත් කළ ද, ජනතාව තැබූ එම බලාපොරොත්තු ඉටු කිරීමටත්, දූෂණයට එරෙහිව දුන් පොරොන්දු ඉටු කිරීමටත් ආණ්ඩුව මුළුමනින්ම අසාර්ථක වී ඇති බවට ඔහු චෝදනා කළේය.
ඒ අනුව, සැප්තැම්බර් 12 වැනිදා (අද) පැවැත්වෙන මෙම රැළිය හරහා වත්මන් ආණ්ඩුවේ ක්රියාකලාපයට එරෙහිව විපක්ෂයේ දැවැන්ත බලවේගයක් ගොඩනැගීමට නියමිත බව දේශපාලන ආරංචි මාර්ග පවසයි.
මේ පුවත තව අයට බලන්න
