විමල්, ගම්මන්පිල, දිලිත් ඇතුළු පිරිස බිත්තියට හේත්තු කරයි... අවසන් තීරණයක්!
පාස්කු ප්රහාරයේ විමර්ශනවලට අදාළව රාජ්ය බුද්ධි සේවයේ හිටපු අධ්යක්ෂ සුරේෂ් සලේ අත්අඩංගුවට ගැනීමට එරෙහිව පැවති විරෝධතා අතරතුර අධිකරණයට අපහාසයක් කර ඇති බව සඳහන් කරමින් හිටපු අමාත්ය උදය ගම්මන්පිල, විමල් වීරවංශ ඇතුළු පිරිසකට එරෙහිව කොටුව මහේස්ත්රාත් අධිකරණයට ඉදිරිපත් කළ පැමිණිල්ල සලකා බැලීම සඳහා අභියාචනාධිකරණයේ සභාපති විනිසුරුවරයා විසින් ත්රිපුද්ගල අභියාචනාධිකරණ විනිසුරු මඩුල්ලක් නම් කර ඇත.
කොටුව මහේස්ත්රාත්වරයා විසින් ඉදිරිපත් කරන ලද මෙම පැමිණිල්ල (14) දින අභියාචනාධිකරණයේ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දුගෙන් සමන්විත විනිසුරු මඩුල්ල ඉදිරියේ කැඳවනු ලැබු අතර එහිදී අභියාචනාධිකරණයේ සභාපති විනිසුරුවරයා සඳහන් කළේ, මෙම පැමිණිල්ල සලකා බැලීම සඳහා ත්රිපුද්ගල විනිසුරු මඩුල්ලක් නම් කරන බවයි.
ඒ අනුව එම ත්රිපුද්ගල විනිසුරු මඩුල්ලේ සාමාජිකයින් ලෙස අභියාචනාධිකරණයේ සභාපති විනිසුරු රොහාන්ත අබේසූරිය, චමත් මොරායස් සහ ආදිත්ය පටබැඳිගේ යන විනිසුරුවරුන් පත් කර ඇත.
අපරාධ පරීක්ෂණ දෙපාර්තමේන්තුව ඉදිරිපත් කරන ලද පැමිණිල්ලක් සලකා බැලූ කොළඹ කොටුව මහේස්ත්රාත් පසන් අමරසේන විසින් හිටපු අමාත්ය විමල් වීරවංශ, උදය ගම්මන්පිල, මන්ත්රී දිලිත් ජයවීර, සුගීශ්වර බණ්ඩාර, අසංක නවරත්න, කථිකාචාර්ය මහින්ද පතිරණ යන අය අධිකරණයට අපහාසයක් කර ඇති බවට තීරණය කළේය.
අනතුරුව අදාළ පුද්ගලයින් සම්බන්ධයෙන් 2024 වසරේ අංක 08 දරන අධිකරණයට හෝ විනිශ්චය ආසනයකට අපහාස කිරීම සම්බන්ධව සුදුසු නීතිමය පියවර ගැනීම සඳහා මහේස්ත්රාත්වරයා විසින් මෙම පැමිණිල්ල අභියාචනාධිකරණය වෙත යොමු කළේය.
මේ පුවත තව අයට බලන්න
