කොටින්ගේ රත‍්‍රන් විශේෂ බැංකු සේප්පුවක... අධිකරණ නියෝගයෙන් එලියට අදී!

මානුෂීය මෙහෙයුම් කාලසීමාවේදී උතුරු පළාතෙන් යුද හමුදා භාරයට ගත් එල්.ටී.ටී.ඊ. සංවිධානයේ රන් භාණ්ඩ සම්බන්ධයෙන් සවිස්තරාත්මක වාර්තාවක් සපයන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම මහතා විසින් අපරාධ පරීක්ෂණ දෙපාර්තමේන්තුවට (CID) නියෝග කර තිබේ.

මෙම පූර්ණ වාර්තාව මැණික් හා ස්වර්ණාභරණ අධිකාරිය හරහා අධිකරණය වෙත යොමු කරන ලෙසටද නියම කර ඇත.

කොටි සංවිධානය විසින් නීතිවිරෝධී අන්දමින් රැස්කරන ලදැයි සැකකෙරෙන මාල, වළලු, මුදු, කරාබු සහ පෙන්ඩන්ට් ඇතුළු රන් ආභරණ මලු 120 ක අඩංගු අයිතම දසදහසකට අධික ප්‍රමාණයක් මේ යටතට අයත් වේ.

හමුදාව විසින් අත්පත් කරගැනීමෙන් අනතුරුව, මෙම රන් භාණ්ඩ මෙතෙක් කල් සුරක්ෂිතව තබා තිබුණේ යුද හමුදා බුද්ධි අංශයට අයත් විශේෂ සේප්පු තුළය.

2025 මැයි මාසයේදී අධිකරණයෙන් නිකුත් කළ නියෝගයකට අනුව රහස් පොලිසිය විසින් මෙම රන් ආභරණ කිරා මැන බැලීමේ කටයුතු සිදු කර ඇත. එම සමස්ත ගණන් හිලව් බැලීමේ ක්‍රියාවලිය සඳහා වසරක පමණ කාලයක් ගත වී තිබේ.

අපරාධ පරීක්ෂණ දෙපාර්තමේන්තුව අධිකරණයට දැනුම් දුන් පරිදි, දැනට මෙම සියලුම රන් භාණ්ඩ ශ්‍රී ලංකා මහ බැංකුවේ විශේෂ සේප්පු තුළ තැන්පත් කර ආරක්ෂාව සලසා ඇත. 

මෙම කරුණු ඇතුළත් වැඩිදුර වාර්තාවක් ඊයේ (16) සලකා බැලීමෙන් අනතුරුව මහේස්ත්‍රාත්වරයා විසින් ඉහත සඳහන් කළ නව නියෝගය නිකුත් කර තිබේ.