භාණ්ඩාගාර වංචාවේ මුදල් හොයාගන්න බැරිවුනොත් ජනතාවට දරන්න වෙනවා..- මුදල් ලේකම්

මහා භාණ්ඩාගාරයෙන් අස්ථානගත වී ඇති බව කියන ඩොලර් මිලියන දෙකහමාරක (2.5) මුදල යළි සොයා ගැනීමට නොහැකි වුවහොත්, එම පාඩුව පියවා ගැනීමට අවසානයේ මෙරට ජනතාවට සිදුවන බව රජයේ මුදල් පිළිබඳ කාරක සභාවේදී අනාවරණය වී තිබේ.

පාර්ලිමේන්තු මන්ත්‍රී හර්ෂ ද සිල්වා මහතාගේ සභාපතිත්වයෙන් යුත් රජයේ මුදල් පිළිබඳ කාරක සභාව හමුවට මහා භාණ්ඩාගාරයේ ලේකම්වරයා, මහ බැංකු අධිපතිවරයා ඇතුළු ඉහළ නිලධාරීන් පිරිසක් කැඳවා තිබූ අවස්ථාවේදී මෙම කරුණු අනාවරණය විය.

මෙම අස්ථානගත වූ මුදල් සොයා ගැනීමට හැකි වුවහොත් එය ගෙවිය හැකි වුවද, එසේ නොවුණහොත් ඉතිරි මුදල ජනතාව මත පැටවෙනු ඇතැයි මෙහිදී අදහස් දැක්වූ මුදල් අමාත්‍යාංශ ලේකම් හර්ෂණ සූර්යප්පෙරුම මහතා සඳහන් කල බව  කාරක සභා සභාපති හර්ෂ ද සිල්වා මහතා පැවැසීය .

මෙම පාඩුව පියවා ගැනීම සඳහා අයවැය සංශෝධනයක් පවා ඉදිරිපත් කිරීමට සිදුවනු ඇති බවත් හර්ෂ ද සිල්වා මහතා පෙන්වා දුන්නේය.

මෙම මූල්‍ය අක්‍රමිකතාව සම්බන්ධයෙන් මහ බැංකුව සෑහෙන වගකීමක් දැරිය යුතු බවට වාර්තාවල සඳහන් වුවද, මහ බැංකු නිලධාරීන් ඒ පිළිබඳව වෙනත් මතයක් දරන බව කාරක සභාව හමුවේ ප්‍රකාශ කර ඇත. 

අදාළ වාර්තාව තමන් වෙත ලැබී නොමැති බව මහ බැංකුව පැවසූ බැවින්, එදිනම ඔවුන්ට එම වාර්තාව ලබා දුන් බවත්, ඒ සම්බන්ධයෙන් සතියක් ඇතුළත පිළිතුරු වාර්තාවක් ලබා දීමට ඔවුන් පොරොන්දු වූ බවත් හර්ෂ ද සිල්වා මහතා පැවසීය‍.

 මෙම මූල්‍ය වංචාව ඊමේල්  සන්නිවේදනය හරහා සිදුවී ඇති අතර, රජයේ ප්‍රධානතම ආයතනයක් වසර පහක් තිස්සේ කිසිදු තාක්ෂණික සහායක් නොමැති ඊමේල් සර්වරයක් පාවිච්චි කිරීම පිළිබඳව සභාපතිවරයා සිය දැඩි මවිතය පළ කළේය. 

මෙවැනි අවදානම් සහගත තත්ත්වයක් තුළ සයිබර් ආරක්ෂණය පිළිබඳ බරපතළ ගැටලු මතුවන බවද ඔහු සඳහන් කළේය.

මෙම සිදුවීම සම්බන්ධයෙන් දැනට රහස් පොලිසිය (CID) සහ පොලිසිය පරීක්ෂණ පවත්වන අතර, වෝහාරික විගණනයක් ද ක්‍රියාත්මක වේ.

ආයතනය සතුව නිසි මාර්ගෝපදේශ පද්ධතියක් නොතිබීම හේතුවෙන් වගකීම එකිනෙකා වෙත පවරා ගැනීමේ අවස්ථාවක් නිර්මාණය වී ඇති බවද කාරක සභාවේදී වැඩිදුරටත් සාකච්ඡා විය.

මෙය මහා පරිමාණ මූල්‍ය වංචාවක් බවත්, සිදුවී ඇති වරද නිවැරදි කර වගකිවයුත්තන් හඳුනා ගැනීමට කටයුතු කළ යුතු බවත් හර්ෂ ද සිල්වා මහතා අවධාරණය කළේය

-lankacnews