gossip lanka news line gossip lanka news line
gossip lanka gossip lanka gossip lanka gossip lanka gossip lanka

හිටපු ජනාධිපති කිව්වේ පට්ටපල් බොරු - හිටපු පොලිස්පති පූජිත් පාස්කු කොමිසමේදී සාක්ෂි දෙමින් කියයි

හිටපු ජනාධිපති මෛත්‍රීපාල සිරිසේන මහතා පුරුද්දක් වශයෙන් බොරු කියන බව හිටපු පොලිස්පති පූජිත් ජයසුන්දර මහතා අද (09) පාස්කු ප්‍රහාරය සම්බන්ධයෙන් විමර්ශනය කරන ජනාධිපති කොමිසම හමුවේ සාක්ෂි දෙමින් පැවසුවේය.

අප්‍රේල් 14 වැනිදා බුලත් දීමට පැමිණ පැය දෙකක පමණ කාලයක් පුජිත් ජයසුන්දර මහතා ජනාධිපති නිල නිවසේ ගත කරමින් සිටියද ප්‍රහාරයක් සම්බන්ධයෙන් වන තොරතුරු තමන්ට පැවසුවේ නැති බව හිටපු ජනාධිපති මෛත්‍රීපාල සිරිසේන මහතා පාස්කු කොමිසම හමුවේ සාක්ෂි දෙමින් පවසන ලදී.

ඔහු පැමිණියේ බිරිඳ සමඟින් වන අතර නිල නිවසින් පිටවූයේ දිවා ආහාරයද රැගෙන බවයි හිටපු ජනාධිපතිවරයා සඳහන් කළේ.

හිටපු ජනාධිපතිවරයා එලෙස පැවසූ කාරණා පට්ටපල් බොරු බව හිටපු පොලිස්පතිවරයා කොමිසම හමුවේ අවධාරණය කළේය.  

ඒ වන විට තමන් සමඟ විරසකයක් පැවතියද රටේ ජනාධිපතිවරයා ලෙස ගෞරවයෙන් සලක තමන් බුලත් දීමට ගිය ද ඒ ගියේද ඔහුගේ ආරක්ෂාව භාරව අධ්‍යක්ෂ ලෙස කටයුතු කළ රොහාන් ද සිල්වා මහතාව දැනුවත් කර ඔහු සමඟින් බවයි පූජිත් ජයසුන්දර මහතා කියා සිටියේ.

''බුලත් දෙන්න යන්න ඕන නිසා මම රොහාන් ද සිල්වා මහත්මයාට කතා කරලා කිව්වා රොහාන් මම බුලත් දෙන්න එනවා ඔයා දන්නවනේ තියෙන තත්ත්වය මට එන්න අපහසුයි ඔයා මම එන වෙලාවට ගේට් එක ළඟට එන්න කියලා. රොහාන් කිව්වා හරි සර් සර් එන්න මම එන්නම් කියලා. ඒ විදිහට මම යද්දී පැජට් පාරේ නිවාස ඉදිරිපිටට රොහාන් ආවා. මම රොහාන් එක්ක තමයි ඇතුළට ගියේ. ඒ යන කොටත් එතුමාට බුලත් දෙන්න විශාල පිරිසක් හිටියා. පෝලිමක් තිබුණේ මම පෝලිමේවත් හිටියේ නැහැ. මම රොහාන්ට කියලා අනිත් පැත්තෙන් ගිහින් බුලත් දුන්නා. රොහාන්  මගේ ළඟ හිටියේ. මම බුලත් දීලා නැමිලා ආචාර කළාට ජනාධිපතිතුමා මගේ දිහාවත් බැලුවේ නැහැ. එතුමා කිව්වා මම බිරිදත් එක්ක ආවේ කියලා. මගේ බිරිඳ මගෙත් එක්ක ජනාධිපතිතුමාට බුලත් දෙන්න ආවේ නැහැ. ඇය යන්න බෑමයි කිව්වා. මම එතන විනාඩි 10ක් වගේ හිටියේ. කෑම තියා වතුර එකක්වත් බිව්වේ නැහැ. ඕකයි එතන වුණේ ස්වාමීනි.''

හිටපු පොලිස්පතිවරයාගේ මෙම පැහැදිලි කිරීම හමුවේ කොමිසම ප්‍රශ්න කළේ ජනාධිපතිවරයා බොරු කියන බව පවසන්නේද යන්නයි.

ඊට පිළිතුරු දෙමින් පුජිත් ජයසුන්දර මහතා පැවසුවේ හිටපු ජනාධිපතිවරයා පුරුද්දක් ලෙස බොරු කියන බවයි.

අපරාධ පරීක්ෂණ දෙපාර්තමේන්තුවේ පොලිස් පරීක්ෂක නිශාන්ත ද සිල්වා මහතාගේ ස්ථාන මාරු කිරීම සම්බන්ධයෙන්ද සිදු වූයේ එවැන්නක් බවයි හිටපු පොලිස්පතිවරයා කියා සිටියේ.

හිටපු ජනාධිපතිතුමා විදෙස් ගතව පැමිණි මොහොතේ මට දුරකථන ඇමතුමක් අරගෙන ඇහුවා කොහේද ඉන්නේ කියලා. එතුමා හොඳටම දන්නවා මම හිටියේ ගුවන් තොටුපොළේ කියලා. කොහාටද යන්නේ කියලා ඇහුවා. මම කිව්වා කාර්යාලයට යනවා කියලා. එතකොට ඇහුවේ කවුද අර නිශාන්ත සිල්වාව මාරුකරන්න කිව්වේ,කාගෙන් අහලද තමුසේ කළේ කියල. මම ඉතින් කිව්වා සර්,සර්මනේ කිව්වේ ආරක්ෂක මණ්ඩලයේදී එයාව මාරු කරන්න කියලා. ලේකම්තුමාටත් කියලා ගිහින් තිබුණනේ කොහොම හරි යවන්න කියලා. උදය සෙනෙවිරත්න මහත්මයාත් කිව්වනේ කියල මම කිව්වා. මම කියපු කෙහෙල් මලක් නැහැ මම ලේකම් එක්කත් බලාගන්නන්කො කියලා දුරකථනය තිබ්බා. ඔහොම දේවල් තමා වුණේ.

එමෙන්ම අප්‍රේල් 16 හිටපු ජනධිපතිවරයා විදෙස් ගතවන අවස්ථාවේ ආචාර කර සුභපැතීමට ගුවන් යානය ඇතුළට පැමිණි අවස්ථාවේ හෝ ප්‍රහාරය සම්බන්ධයෙන් තමන්ට තොරතුරු කිසිවක් නොපැවසූ බවද මෛත්‍රීපාල සිරිසේන මහතා කොමිසම හමුවේ සාක්ෂි දෙමින් පවසන ලදී.

එයද අසත්‍ය බවයි අද පූජිත් ජයසුන්දර මහතා සාක්ෂි දෙමින් කියා සිටියේ.

''ඒ වෙද්දී ජනාධිපතිතුමා මා සමඟ විරසක වී සිටියත් ගෞරවය ගැන සලකලා මම ගුවන් තොටුපොළට ගියා. මම ගුවන් යානය ඇතුළට ගියේ නැහැ. එළියෙදි තමයි ආචාර කළේ. එතුමා රටේ ජනාධිපති වුණාට මම ර‍ජයේ නිලධාරියෙක්. මම මගේ රාජකාරිය කළේ. මට මතකයි එතුමා මා දිහා බලන ආකාරය. තරහකාරයෙක් දිහා බලන ආකාරයට තමයි බලන්නේ. අප්පිරියාවකින් වගේ තමයි බලන්නේ. ඒ කාලයේ මම ජනාධිපතිතුමා හරහා කරගන්න ඕන දේවල් ආරක්ෂක ලේකම්තුමා  නැත්නම් ජනාධිපති ලේකම්තුමා හරහා තමයි කරගත්තේ. '' යනුවෙන් පූජිත් ජයසුන්දර මහතා සාක්ෂි දෙමින් පැහැදිලි කරන ලදී.


gossip lanka
gossip lanka gossip lanka gossip lanka gossip lanka

 
Design by Free WordPress Themes | Bloggerized by Lasantha - Premium Blogger Themes lanka mirror sinhala| ape.lk - Best classified website in Sri Lanka